Àpilẹ̀kọ Ewì

Ẹ̀rọ Omi àti Ẹ̀rù | Mof’Ólúwawò O MojọláOlúwa

Ẹ̀rọ Omi

Báwo ni ó máa ń rí l’ára nígbà tí o bá ń gbìyànjú àti gba ẹlòmíràn là tí ìwọgan an wá di ẹni tó nílò ìgbàlà, nígbà tí èsúó bá pa ìdì dà tó ń lé ajá? Ojú a gba ni tì fún ara ẹni, ara ẹni a kọ́ tìọ̀. Bẹ́ẹ̀ gẹ́lẹ́ ni ó rí lára mi ní alẹ́ àná. Níṣe ni mo wà ní ibi àjọ̀dún àṣà àti ìṣe tó lárinrin kan. Nígbà tí ó yá, mó nílò láti gbọ̀nsẹ̀. Mo lọ sí ilé ìtọ̀ àwọn obìnrin láti ṣe bẹ́ẹ̀. Nígbà ti mo ṣetán, mo ṣí ẹ̀rọ omi láti fọ’wọ́, lẹ́yìn tí mo ti fi ọṣẹ s’ọ́wọ́. Omi kọ̀, kò yọ. Mo tún ṣi sí ọ̀nà míràn, omi ò yọ. Ọ̀rọ̀ ilé ìgbọ̀nsẹ̀ Nàìjíríà wá kà mí láyà. Ǹjẹ́ ki ni ṣíṣe? Mo gbé ìgò omi mímu mi jáde láti inú àpamọwọ mi pé kí ń fi ṣan ọwọ́. Ìgbàyí gan ni arábìnrin kan náà jáde láti ilé ìgbọ̀nsẹ̀ láti fọ ọwọ́ rẹ̀ bákan náà. Arábìnrin yìí jẹ́ ọ̀kan lara àwọ́n àlejò pàtàkì níbi àjọ̀dún náà. Bẹ́ẹ̀, inú mi dùn láti jẹ́ olùgbàlàarẹ̀.

‘Ẹ má tíì fi ọṣẹ s’ọ́wọ́ o, omi kò yọ,’ mo wí fun.

Ó kọ́kọ́ wò mí ní ìwò àìkànisí

Mo tún ọ̀rọ̀ mi sọ.

‘Kò sí omi. Emi pàápàá ti fí ọṣẹ s’ọ́wọ́ kí n tó mọ̀’

‘Lòòtọ́?’ Ó bèèrè láì gbàgbọ́. O sì tẹ ẹrọ omi.

Omi yaaa!

Ọ̀rọ̀ pèsì jẹ. Mi ò mọ kí lààwí. Mo kàn ń wò sì!

Nígbà tí ó yá, mo ṣí ẹ̀rọ omi náà.

Omi!

 

Ẹ̀kọ́: Ẹ̀rọ omi títẹ̀ yàtọ̀ sí yínyìn.


Ẹ̀rù

Ẹ̀rù! Ẹ̀rù!Ẹ̀rù!

Ẹ̀rù a p’ọmọ kí ikú ó tó dé

Ẹ̀rù ní ò jẹ́ k’ọ́lẹ́ ó gbìn

A ò mọ̀ b’ójò ó rọ̀

Ẹ̀rù ni ò jẹ́ k’ójo o bọ́ sóde

A ò mọ̀ bí kìnìún ń bẹ l’óde

Ẹ̀rù ni ò jẹ́ k’ọ́kùnrin ó k’ọnu ìfẹ́

A ò mọ̀ bí bẹ́ẹ̀ni ni ó jẹ̀ẹ́ àbí bẹ́ẹ̀kọ́

Ẹ̀rù ni ò j’óbìnrin ó jẹ́hẹn

Tó bá tún lọ rí bi ti ìjọ́sí

Ẹ̀rù ni ò j’ópó ó fẹ́ ẹlòmíràn

A ò mọ̀ b’éléyìí náà á tún sánkú

Ẹ̀rù ni ò jẹ́ ka jẹun yó lònìí

Kí ni ó kù ta ó jẹ l’ọ́la

Ẹ̀rù ni ò jẹ́ ká kúrò níle mèrẹ́ntì

Níbo la f’owó sí?

Ẹ̀rù ló le bàbá Mẹ́ta lọ

Níbo la f’owó sí?

Ọ̀gá ń bọ̀, ọ̀gá ń bọ̀ nií pa ọmọṣẹ́

Ẹ̀rù ní b’óun bá ti wọlé ká pa lọ́lọ́

Kí jìnìjìnì bo ilẹ̀

Kí gbogbo àfojúsùn fò síta

Kí gbogbo ìgbàgbọ́ yọ dànù

Kí ìgboyà ó dohun ìgbàgbé

Kí àìnírètí gbà ìjọba

Ẹ̀rù!Ẹ̀rù!Ẹ̀rù!

Ẹ̀rù á rán ọmọ lọ s’íbojì l’ọ́jọ́ àìpẹ́

Ẹ̀rù ò bímọ re

Ẹ̀rù ò bí ǹkan re.


Mof’Ólúwawò O MojọláOlúwa jẹ́ amòfin àti ònkọ̀wé. O ti ko ọ̀pọ̀lọpọ̀ ewì àti ìtàn àròsọ ti a ti tẹ̀ jáde lórísirísi ní ilẹ̀ Áfíríkà, ní inú onírúurú ìwé àkójọpọ̀ ewì àti ìtàn pẹlu lori ayélujára. Ó féràn láti máa kọ ìtàn àti ewì, àti láti maa ya àwòrán. Èyí jẹ́ ọ̀kan lára àwọn ewì/ìtàn rẹ̀. 

Related posts

FÍDÍÒ: Ewì Ènìyàn | Ọ̀rẹ́dọlá Ibrahim Àjàtóntìrìàjàbalẹ̀

atelewo

Sùúrù (Orin Démíanù ọmọ Málì àti Ọba Náàsì) | Ọ̀rẹ́dọlá Ibrahim

atelewo

Ẹ̀rọ Ìránsọ | Kọ́lápọ̀ Ọlájùmọ̀kẹ́

atelewo

1 comment

Livingstones December 2, 2018 at 7:15 pm

Eṣe púpọ̀ ẹgbẹ Atelewo

Reply

Leave a Comment